Gal 2 | WSK | STEP | Yar 14 namaram asele ani Barnabas ilak aking Jerusalem namaman. Ale ani Titus manem se agarak namaram.

Galatians 2

Jerusalem Kris supuling alo Paul ko ura ko amilmilaman

1 Yar 14 namaram asele ani Barnabas ilak aking Jerusalem namaman. Ale ani Titus manem se agarak namaram. ^{▼▼Gal 2:1 Jerusalem biguwura biya: Acts 15:1-2 (1-35).} 2 Ani agata aga ikia te me namerem. Mena. Kaem ani namirikko balam se namerem. Ale ani girem Kris kari supuling alo mu la arungu biguwurem, ale ura ani sor saki ko kariimet nunga ningi bita se den gilalong yawara nunga manarukasam mu ko dugu duap nunga manem se ikiman. Mu awuk, aninga ura dagulok menarukko angamang me anikaso.

3 Se aga bo Titus mu nu Greek kari. Bare nuna nu ko kumik guang batagarmonko den bo me balukasan. Mena. 4 E kari sang ko balukasan, bare nuna kawel kari. Jesus Kristus nanga bataguru tam, se ana munan aora bowa ningi me bagasan. Bare kari ari imitang mu nuna munan ana karo tusan wore ko ikimonko nangarak launuria iwita maman, ale biguwura te utu naguman, ale munan aora te aking nanga talipomonko karogo kaeyakasan. 5 Bare ana nononga den mu ko buna bo me iki karo tuman, am ko sokel menawuman. Mu awuk, den gilalong yawara diram la nenengate anirukko nangamang anikaso.

6 Se kari Kris supuling ko bagakasan mu den bo karogo me aga manorman. Mena. (Bare nuna supuling nunup bibiya agi nunup mena agi, mu ani ikisam mel gotektir, Kaem mel mu te me nanga tuteso.) 7 Mu kari ari imitang nuna ikiman, Kaem ani noko den gilalong yawara wonong saki ko kariimet nunga manikko ura balu aisam, nu Peter den gilalong yawara Juda kariimet nunga manukko ura balu tuam iwitata. 8 Mu Kaem Peter Juda alo nunga ningi apostle ura taukko sokel tuam se te ura bitakaso. Butatala, ani wonong saki ningi apostle ura bitirikko sokel aisam se te ura tokasam. 9 Mu Jerusalem Kris alo nunga supuling bibiya James, Peter, se John mu nuna ikiman, Kaem kota ura imi ani aisam ale sokel aisukaso mu ko ikiman. Buta se nuna ana Barnabas ilak nagiting ilu se nangarak launuria beteman, ale iwita nanga manorman: ana ilagala wonong saki ko kariimet ningi ura betenakko balman, se nuna mu Juda kariimet ningi ura betemonko balman. 10 Ale nuna den suwanta iwita ana ilagala ago nanga manorman, ana kariimet nungumik mel mena mu ninguru nunga sinar tanakko balman. Se ani munan sumu karogo ko kuesam, ale karogo ko sail tagisam. ^{▼▼Gal 2:10 Kariimet nungumik mel mena nunga saonga: Acts 11:29-30.}

Paul Peter ko memek wetang te beteram

11 Se Peter Antioch tairam tom mu te ani nu kilek memek bitakaso mu wetang te manem. 12 Nu iru la tairam mu nu yawarakala bitakaso, ale wonong sika ko Kris kariimet, Juda ko mena, wore arungu dagikaso ale na nokaso. Bare udagi James ko kari sang Antioch taiman, ale nunga ningi sang balukasan Kris alo Juda ko mena wore yam karogo nungumik guang batagarmonko makasan. Se Peter nguangaram, ale kota numi kutuwuram ale tagi tam, ale udagi sor saki ko kariimet arungak me na nokaso, kawelakaso. 13 Se Juda Kris saki alo agotala Peter ko kawel kiwem mu aringiman ale uwutatala bitakasan. Se Barnabas mu agotala arungu tagi tam.

14 Bare ani nuna nungarkikasam, mu kilek nuna bitakasan mu Kaem ko den gilalong yawara karogo diram mena. Se ani nuna suen la nomokete Peter iwita manem, “Ni Juda kari,” maem, “bare ni Juda kari iwita me bagasam, ni sor bo ko kari iwita bagasam. Mu terong. Bare ni awuk se sor saki ko kariimet Juda nunga munan karo tumonko nunga diruwusam a? Kilek sumu me terong.” ^{▼▼Gal 2:11-14 Peter motam motam diram la bitakaso: Acts 10:34-35; 11:1-4. Bare udagi nu nguangaram munan kilimik bitakaso se ko Paul nu ining tuam.}

15 Ani Peter uwuta manaru se balem, “Ni analak Juda nunga gue te bilangaman. Ana sor saki ko kari, Juda saki nunga balsan ‘memek ago’ masan, mu nunga iwita mena. 16 Bare ana ikisan, kari bo Law Den karo tuok se Kaem nu kari ningo diram ko balukko mu mena. Kari Jesus Kristus ko gomang ningi nunguning umutang Kaem nu kari ningo diram ko ma balukko. Buta se ana Jesus Kristus ko nangamang ningi nunguning aram, se Kaem te nanga balam ana kari ningo diram. Mu awuk, ana ikiman, ana Law Den karo tunak ale Kaem koma te kari ningo diram ko me aratanakko. Mena. Kari bo ta Law Den karo tui laguruk se Kaem nu kari ningo diram ko ma balukko mu mena. ^{▼▼Gal 2:16-17 Law Den se nangamang ningi nunguning ko den: Rom 3:20-28.}

17 “Ana Kaem koma te kari ningo diram ko aratanakko nangamang anikaso. Se ana Law Den nabiring tuman ale Jesus Kristus ko nangamang ningi nunguning aram. Se umutang ko nanga gue suwan sikina ana Kristus te munan kiara ko kari ko arataman ma nanga balsan. Se den mu nunguning e? Mena! 18 E Law Den ani menawurikko sail tagikasam mu aking sokel ago anirukko sail tagirik mu asele, kariimet diram la agarkomon, ani munan kiara ko kari! Bare ani uwuta me bitirikkowo! 19 Mu awuk, ani Law Den karo paguwurem ale te kuerem. Buta se aitak ani den mu abiring tuem, ale Kaem ko kari ko la diram bagirikko. 20 Kristus tam kangono te kueram mu ani karogo kuerem. Buta se, marak sokel aitakta ani te bagasam, mu ani agata aga marak sokel mena. Mu Kristus aninga angamang ningi bagoso. Se aitak aninga aolak bagara suen biya ali imi te, mu ani Kaem ko Namar Jesus Kristus ko angamang ningi nunguning te bagasam. Nu gomang aisam, ale ani ago ko kueram. Se ani Kaem gomang nangaram ale Kristus te nanga giokko lage nungam mu aga kausam, umutang ani me abiring tuekkowo! Mena. E ana Law Den te kariimet ningo diram ko aratanakko terong ale mu, Kristus kueram mu ko nunguning mena ale wore. Bare uwuta mena. Mu ko nunguning karogo.” ^{▼▼Gal 2:19-21 Paul Law Den buring tuam: Phil 3:4-9. Ana Law Den te kuesan: Rom 7:5,8; 1 Cor 15:56.}

21